హైదరాబాద్ టుడే కాంక్లేవ్ కు అనూహ్య స్పందన..
తెలుగు సూపర్ న్యూస్,హైదరాబాద్, ఏప్రిల్ 17,2023: ఢిల్లీ పబ్లిక్ స్కూల్, పల్లవి గ్రూప్ ఆఫ్ ఇనిస్టిట్యూషన్స్ సంయుక్తంగా నిర్వహించిన రెండు రోజుల హైదరాబాద్ టుడే కాంక్లేవ్ (హెచ్‌టీసీ)కి విదేశాల నుంచి వచ్చిన విద్యావేత్తలు, ప్రముఖ వక్తలు, ఇతత నిపుణులు నుంచి అద్భుతమైన స్పందన లభించింది.
రెండు రోజులు (ఏప్రిల్ 15, 16వ తేదీలు) జరిగిన ఈ కార్యక్రమంలో 800 మందికి పైగా ప్రధానోపాధ్యాయులు, విద్యార్థులు,ఉపాధ్యాయ సిబ్బంది పాల్గొన్నారు. 21వ శతాబ్దపు విద్యలో అంతరాలు అనే అంశంపై హెచ్‌టీసీ సహ వ్యవస్థాపకుడు మల్కా యశస్వి, తెలంగాణ రాష్ట్ర కార్మికశాఖ మంత్రి చామకూర మల్లా రెడ్డి మధ్య జరిగిన చర్చ ఈ కాన్ క్లేవ్‌లో ఆకట్టుకుంది.
మల్కా యశస్వి అడిగిన ప్రశ్నలకు మల్లా రెడ్డి ఓపికగా సమాధానమిచ్చారు. భవిష్యత్తులో విద్యారంగంలో ఎదురయ్యే సవాళ్లపై జరిగిన సంభాషన మరింత ఆసక్తిగా సాగాంది. ఐటీశాఖ మంత్రి కేటీ రామారావు 500 కంపెనీలను భారత్‌కు తీసుకొచ్చి మరిన్ని ఉద్యోగావకాశాలను సృష్టిస్తున్నారని మల్లారెడ్డి అన్నారు. అందరూ తాము చేసే పనిపై దృష్టి పెట్టాలని సూచించారు. కష్టపడితే అసాధ్యమైనదేదీ లేదని, రిస్క్ తీసుకుని ముందుకు సాగాలని ఆయన అన్నారు.
‘‘ప్రణాళిక, అంకితభావం మరియు నిరంతర ప్రయత్నం ప్రతికూలతను సానుకూలతగా మార్చగలవు. ఆరోగ్యం మరియు ఫిట్‌నెస్ చాలా ముఖ్యం. స్వీయ నియంత్రణ, మంచి అలవాట్లు, ప్రణాళికాబద్ధంగా ప్రారంభించడం మంచి వ్యాపారవేత్తగా మారడానికి దోహదపడుతుంది. సినిమాలు, బయటి ఆహారం, రిసార్ట్‌లు, విహారయాత్రలపై సమయాన్ని వృథా చేయవద్ద’’ని మంత్రి మల్లారెడ్డి సూచించారు.
అనంతరం మీడియా ప్రతినిధులతో మాట్లాడిన యశస్వి, జాతీయ విద్యా విధానాన్ని అమలు చేయడంలో ఎదురవుతున్న సవాళ్లపై హెచ్‌టీసీ కూలంకషంగా చర్చించినట్లు తెలిపారు. క్రీడల సుస్థిరత మరియు కీలక సమస్యల గురించి చర్చించడానికి భవిష్యత్తులో ఈ కాంక్లేవ్ వేదికగా ఉపయోగపడుతుందన్నారు.
దేశంలోని వివిధ ప్రాంతాల నుంచి విచ్చేసిన విద్యావేత్తలు, ప్రధానోపాధ్యాయులు, ఉపాధ్యాయ సిబ్బందికి మల్కా యశస్వి కృతజ్ఞతలు తెలిపారు. ఈ సందర్భంగా జాతీయ విద్యా విధానం (ఎన్‌ఈపీ)కి సంబంధించిన హ్యాండ్ బుక్‌ను కూడా విడుదల చేశారు.
అలాగే ఈ కార్యక్రమంలో ‘ట్రాన్స్‌ఫార్మింగ్ మేనేజ్‌మెంట్ ఎడ్యుకేషన్’ అనే అంశంపై లోక్ సత్తా పార్టీ వ్యవస్థాపకుడు, మాజీ ఐఏఎస్ అధికారి డాక్టర్ జయప్రకాశ్ నారాయణ చేసిన ప్రసంగం ప్రేక్షకులను ఉర్రూతలూగించింది.
విద్యా వ్యవస్థను మరింత మెరుగుపరచడానికి ఢిల్లీ పబ్లిక్ స్కూల్స్ మరియు పల్లవి ఇంటర్నేషనల్ స్కూల్స్ చేపడుతున్న వివిధ కార్యక్రమాలను కేంద్ర ,రాష్ట్ర ప్రభుత్వాలు తప్పనిసరిగా ఉపయోగించుకోవాలని ఆయన అన్నారు.
తర్వాత సీబీఎస్సీ(CBSE) డైరెక్టర్ డాక్టర్ బిస్వజిత్ సాహా ‘గ్లోబలైజేషన్ ఆఫ్ మేనేజ్‌మెంట్ అండ్ టెక్నికల్ ఎడ్యుకేషన్’పై వివరంగా ప్రసంగించారు. డీపీఎస్ మరియు పల్లవి గ్రూప్ ఆఫ్ స్కూల్స్ అండ్ కాలేజ్ చైర్మన్ మల్కా కొమరయ్య ఈ కాన్ క్లేవ్ నిర్వహించడం వెనుక గల కారణాన్ని వివరించారు.
NEP ప్రధాన సవాళ్లు, అవకాశాలు, పరిష్కారాలు, వివిధ అంశాలపై అంతర్దృష్టులు, దృక్కోణాలను పంచుకోవడానికి విధాన రూపకర్తలు, నిర్వహణ, జాతీయ, అంతర్జాతీయ విద్యావేత్తలకు ఒక వేదికను అందించడానికి ఈ కాన్ క్లేవ్ నిర్వహించారు.